Наша газета - "Перамога"!



Раготнаўская каманда - чэмпіён абласной спартакіяды

Раготнаўскія лыжнікі, якія прадстаўлялі Дзятлаўскі раён на зімовай абласной спартакіядзе для сельскіх жыхароў (спаборніцтвы адбыліся 3-4 лютага ў Лідзе), атрымалі камандную перамогу ў агульным заліку і занялі шэраг прызавых месцаў у індывідуальных гонках і эстафетах.

Медальны пачын для нашай каманды зрабіла Алена Апанасік. Яна фінішавала з трэцім вынікам ва ўзроставай катэгорыі дзяўчат 1994-1996 гадоў нараджэння. Дыстанцыю 1260 метраў (1 круг) Алена прабегла за 3 хвіліны 48 секунд. У гэтай жа катэгорыі вызначылася і самая юная з удзельніц — Дзіяна Татарынава. Яна паказала 6-ы вынік (4.18) сярод 62 стартаваўшых. У дваццатку лепшых забеглі Таццяна Лазоўская (14-е месца, 4.55) і Вікторыя Фабішэўская (16-е месца, 5.12).



Якую дапамогу аказваць пры апёку?

Апёкі рознай ступені і балявы шок, які пры іх узнікае, — наступствы пажару. Галоўнае — навучыцца дзейнічаць граматна ў такой сітуацыі.

Па-першае, па магчымасці трэба ўвесці чалавеку, які папакутаваў, абязбольваючы сродак; абавязкова накласці асептычную павязку на апечаную паверхню або прыкрыць яе стэрыльнай прасціной; у час транспарціроўкі чалавека ў стацыянар забяспечыць нерухомасць пашкоджаных органаў. Такая мабілізацыя дапаможа папярэдзіць дадатковае пашкоджанне тканак і развіццё балявога шоку.



"Таму не дзівіся, што п'яныя пабіліся"

Кожнае трэцяе забойства і кожнае чацвёртае наўмыснае нанясенне цяжкіх цялесных пашкоджанняў маюць бытавую аснову. Іншымі словамі, яны здараюцца паміж людзьмі, якія жывуць у адной кватэры ці доме.

Часцей за ўсё прычынай гэтых скандалаў з'яўляецца моцнае "сяброўства" з алкаголем аднаго ці двух членаў сям'і. Як вынік, кожны пяты з ліку памерлых па знешніх прычынах памірае ад выпадковага атручэння алкаголем.

Міліцыя не можа ў такой сітуацыі заставацца ўбаку: так, у 2010 годзе па так званых прэвентыўных артыкулах Крымінальнага кодэкса Рэспублікі Беларусь узбуджана 10 крымінальных спраў у адносінах да асобаў, якія пагражалі нанесці траўмы ці ўвогуле забіць другога члена сям'і. Да прыкладу, жыхар пасёлка Гезгалы сярэдняга ўзросту, які быў у нецвярозым стане, схапіўшыся за нож, пагражаў жонцы забойствам, штосьці падобнае адбылося і ў адной з маладых сямей Дзятлава.



З пасяджэння камісіі па справах непаўналетніх

АПОШНІ ШАНЦ ЗАСТАЦЦА МАМАЙ

Гэтая жанчына ўжо пазбаўлена бацькоўскіх правоў у адносінах да двух старэйшых дзяцей. Цяпер у яе застаўся апошні шанц застацца мамай — у адносінах да свайго малодшага дзіцяці. Быў час, калі яно ўжо выхоўвалася ў сацыяльным прытулку. Тады жанчына ўзялася за розум, закадзіралавася, ўладкавала сваё жыццё, дзіця ёй вярнулі. Толькі, на жаль, грамадзянка С. ізноў узялася за старое: злоўжывае алкаголем, здараецца, дзіця на працягу некалькіх дзён не наведвае дзіцячы сад. Бывае і так, што яго забірае да сябе сястра грамадзянкі С, якая таксама любіць заглянуць у чарку. Ды і ў хаце пануе беспарадак, парушаюцца правілы пажарнай бяспекі.



Вынікі абласных алімпіяд

У абласной алімпіядзе па працоўным навучанні дыплом трэцяй ступені атрымаў прадстаўнік Дзятлаўшчыны Вадзім Кедук (10 клас, Казлоўшчынская сярэдняя школа). Вучань 9 класа гімназіі № 1 г. Дзятлава Аляксей Шундрык адзначаны дыпломам трэцяй ступені па алімпіядзе па геаграфіі. Яшчэ адна вучаніца гімназіі Марыя Старыкава атрымала дыплом другой ступені па алімпіядзе па англійскай мове.

Вучань сярэдняй школы № 1 г. Дзятлава Раман Францішчык на абласной алімпіядзе па гісторыі атрымаў дыплом першай ступені. Таксама юнак адзначаны дыпломам другой ступені па выніках абласной алімпіяды па грамадствазнаўству.



Воін суровага Афгана

На Дзятлаўшчыне жыве шмат мужных людзей. I адзін з такіх — Вячаслаў Вячаслававіч Касянюк. Ён — ветэран вайны ў Афганістане. Узнагароджаны медалём "Ад удзячнага афганскага народа", двума юбілейнымі медалямі, нагрудным знакам "Выдатнік Савецкай Арміі".

Нарадзіўся ў 1969-ым годзе на Дзятлаўшыне, у вёсцы Погіры. Бацька Вячаслаў Іванавіч працаваў трактарыстам у калгасе. Маці Яніна Іванаўна — на ферме. Яшчэ ў Вячаслава ёсць сястра Наталля і брат Аляксей. Вучыўся Вячаслаў у Жукоўшчынскай школе. У 1984-ым годзе, скончыўшы школу, ён паступіў у Казлоўшчынскае СПТВ, дзе атрымаў спецыяльнасць "трактарыст-шафёр". У 1987-ым годзе, пасля заканчэння вучылішча, уладкаваўся слесарам у калгас "1-га Мая", Адпрацаваў там паўгода, у лістападзе 1987-га года Вячаслава прызвалі ў армію. Спачатку ён трапіў служыць у пагранічныя войскі ў Сярэднюю Азію, у горад Пяндж на мяжу з Афганістанам. Тры месяцы праходзіў службу ў вучэбным цэнтры.
Потым было размеркаванне, хто далей жадае ісці служыць: вадзіцелем БТР або БМП.



З цягам часу боль праходзіць

У Булата Акуджавы ёсць такія радкі: "Ах, война, что ж ты сделала, подлая: стали тихими наши дворы, наши мальчнки головы подняли, повзрослели они до поры..." Легендарны бард прысвяціў іх Вялікай Айчыннай вайне. Аднак, на мой погляд, яны адлюстроўваюць не толькі характар канкрэтнай вайны, а, увогуле, вайны — як найбольшага зла на свеце. Яно забірае ўсё лепшае: маладосць, каханне, шчасце, жыццё. Так было спрадвеку: ці ў час антычных сутыкненняў, ці ў Першую сусветную вайну, ці ў Вялікую Айчынную. Так было і ў час вайны ў Афганістане. Цяпер меркаваць аб ёй мы можам па стужках "Грозовые ворота", "9 рота", іншых баевікоў на гэтую тэматыку. Калі глядзіш, становіцца страшна: смерць, кроў, гібель маладых салдат — яшчэ зусім юнакоў. Дахаты, да сваіх родных і блізкіх, да каханых дзяўчат многія з іх вярнуліся "цынкавымі хлопчыкамі", так і не паспеўшы паспрабаваць асалоду жыцця. На жаль, гэтыя наступствы выклікаюць і цяперашнія падзеі ў Чачні.



Пра сняжынку, якая стала кропелькай

Жыла-была на свеце маленькая сняжынка. Дакладней, яна прыляцела з неба разам з іншымі сняжынкамі і прызямлілася непадалёку ад вялікай елкі. Яна ляжала побач з усімі сняжынкамі, утвараючы гурбу, і зіхацела на сонейку, пераліваючыся рознымі колерамі: ружовым, сінім, аранжавым, зялёным, блакітным.

Усе, хто бачыў сняжынкі, быў зачараваны імі. I наша сняжынка думала: "Якая ж я прыгожая!".

Прайшлі тры зімовыя месяцы, сонейка пачало грэць мацней, бо памалу пачалася вясна, і сняжынкі пачалі раставаць. "Як жа так! — заплакала сняжынка. — Я была такая прыгожая, зіхацела на сонейку, а зараз я раствараюся, як і іншыя". Плакала сняжынка і не заўважыла, як разам з іншымі ўтварыла крынічку і пабегла па зямлі.



Подых жыцця

Калі ўжо звыкаешся са снегам, маразамі, завірухамі, ледзяным ветрам, калі нават пачынаеш радавацца зіме, асабліва пасля навагодніх святаў, раптам... вясна напамінае пра сябе.

Так, напамінае за кошт адлігі, калі спачатку трохі сыдзе снег, і ледзь-ледзь адчуваецца цяпло, як напамін, што за халоднай зімой неўзабаве прыйдзе пяшчотная вясна з ласкавым сонейкам, якое штодзень будзе набірацца моцы і адаграваць зямельку пасля сцюжы. Менавіта ў час адлігі адчуваецца гэты духмяны, непаўторны вясновы подых. Подых самога жыцця.



Валейбол. Чэмпіянат вобласці.

29-га студзеня абедзьве нашы валейбольныя каманды - жаночая "Белтэрміз" і мужчынская "Белтэлекам" -
выправіліся ў паход за тытуламі чэмпіянату вобласці ў першай лізе.

Жаночы "Белтэрміз" стартаваў у Мастах. Мастоўская каманда, як і летась, адзін з фаварытаў чэмпіянату. Як і летась, дзятлаўчанкі прайгралі гасцявы матч 0:3. Не сказаць, каб перавага гаспадынь пляцоўкі была вялікая, але ў кожным з трох сэтаў гасцявая каманда ў якім-небудзь з кампанентаў гульні ды саступала.

Вынік па сэтах наступны: 25:21, 25:20, 25:17. Чаго бракавала дзятлаўчанкам? На думку трэнера каманды Васіля Русіна, на пачатку матча гасцей бянтэжыў вялікі аб'ём залы. Нязвыклы ён для нашых валейбалістак. Пакуль адаптаваліся, упісаліся ў аб'ём, адпусцілі саперніц у ліку. Наступнай праблемай стаў прыём планернай падачы. Сваёю ж падачай азадачыць мастаўчанак удавалася нячаста, наша падача была прасцейшая і лягчэйшая для прыёму. Выявілася і частая для стартавых матчаў няўзгодненасць у дзеяннях — памылкі ў падзеле зонаў адказнасці на пляцоўцы.



Зімовы міні-футбол: гульня працягваецца

У зімовым адкрытым чэмпіянаце раёна па міні-футболу лідыруе трыумвірат — дзятлаўскія "Ніва" і "Універ", казлоўшчынскае "Юнацтва".

У турніры ўдзельнічаюць 8 каманд. Тры — "Усмешка", "Ніва", "Універ" — прадстаўляюць Дзятлава, яшчэ тры — "Юнацтва", "Факел", "Old Friends" (Старыя сябры) — з'яўляюцца прадстаўнікамі Казлоўшчыны, "Спартак" змагаецца за спартыўны гонар Наваельні. Восьмая каманда — з Паўлава (Слонімскі раён).

Першы зімовы раённы чэмпіянат па міні-футболу стартаваў 22-га студзеня і прадоўжыцца да сакавіка-красавіка. Матчы праходзяць у спартыўнай зале Казлоўшчынскай школы зазвычай па выхадных днях, іншым разам — па вячэрніх серадах і пятніцах.



Шахматы: Чэмпіёнская гонка

Чэмпіёнскую гонку ўзначаліў дуэт Андрэя Ранцэвіча і Андрэя Лявончыка.

Чэмпіянат раёна па шахматах стартаваў 29-га студзеня. За чэмпіёнскі тытул змагаюцца 11 шахматыстаў. Ідэальна стартаваў Андрэй Ранцэвіч, у двух першых турах ён толькі перамагаў. Астатнія ўдзельнікі турніру панеслі меншыя ці большыя страты.



Змяненні ў правілах дарожнага руху

25 лістапада 2010 года Прэзідэнтам Рэспублікі Беларусь быў падпісаны Указ №611 "Аб унясенні дапаўненняў і змяненняў у Правілы дарожнага руху". Згодна з гэтым дакументам удакладняюцца некаторыя паняцці і трактоўкі правілаў.

Так, удакладняецца паняцце "пакіданне месца дарожна-транспартнага здарэння". Зараз пад гэта вызначэнне падпадаюць дзеянні ўдзельніка ДТЗ, накіраваныя на ўтойванне факта такога здарэння або абставінаў яго ўчынення, якія прымусілі супрацоўнікаў дзяржаўтаінспекцыі да неабходнасці правядзення мерапрыемстваў па ўстанаўленні (пошуку) дадзенага ўдзельніка і (або) пошуку транспартнага сродку.



Творчы саюз дае вынік

У чым заключаецца радасць працы для настаўніка? Пра гэта я спытала ў настаўніцы матэматыкі гімназіі №1 г. Дзятлава Ніны Іванаўны Трафімчык і пачула ў адказ: "Найбольшую радасць і задавальненне перажываеш тады, калі вучань, у якога ўкладзена шмат сіл і ведаў, дасягае поспеху. Тады разумееш, што працаваў не дарэмна, што ты дапамог свайму выхаванцу паверыць у свае сілы, знайшоў той ключык, якім змог адамкнуць самыя патаемныя скарбонкі яго душы і таленту".

І гэта сапраўды так. Шмат гадоў ішлі да поспеху Ніна Іванаўна Трафімчык і Валера Емяльянчык, вучань дзясятага класа нашай гімназіі, уладальнік дыплома трэцяй ступені на абласной алімпіядзе па матэматыцы. Ішлі з пераменным поспехам, то дасягаючы выніку, то зноў трацячы яго (Валера быў прызёрам абласной алімпіяды ў сёмым класе). А сёлета зноў сваёй працай і настойлівасцю, а яшчэ вялікім захапленнем матэматыкай Валера даказаў, што ён — адзін з лепшых матэматыкаў у вобласці.



Аб асаблівасцях рэгулявання працы жанчын

1. Якія падставы дазваляюць звальняць цяжарных жанчын; жанчын, якія маюць дзяцей ва ўзросце да трох гадоў; адзінокіх маці, якія маюць дзяцей ва ўзросце ад 3 да 14 гадоў (дзяцей-інвалідаў ва ўзросце да 18 гадоў)?

Жанчын вышэйпералічаных катэгорый, як і ўсіх работнікаў, дазваляецца звальняць па ініцыятыве наймальніка, маючы наступныя падставы:
— пры ліквідацыі арганізацыі, спыненні дзейнасці індывідуальнага прадпрымальніка (п.1 арт. 42 Працоўнага Кодэкса, надалей — ПК);
— пры сістэматычным невыкананні работніцаю без уважлівых прычын абавязкаў, што ўскладзены на яе працоўным дагаворам ці правіламі ўнутранага працоўнага распарадку, калі да яе раней прымяняліся меры дысцыплінарнага спагнання (п. 4 арт. 42 ПК);

Источник: Дятловская районная газета "Перамога" и интернет-портал http://diatlovonews.by/