Як два кантэйнеры палепшаць экалогію



Сартаваць важна.

Гэты факт неаспрэчны для ўсяго цывілізаванага свету, беларусы не выключэнне. Неад'емнай часткай інфраструктуры шматпавярховых забудоваў сталі кантэйнеры для раздзельнага збору другасных матэрыялаў, якімі дзятлаўчане ўсё актыўней карыстаюцца. Заставалася адкрытым пытанне з сарціроўкай у прыватным сектары. Аднак сёлета Дзятлаўскае РУП ЖКГ вырашыць і яго.

Цяпер у Дзятлаўскім раёне ёсць палігон для збору цвёрдых камунальных адходаў у Нарбутавічах і міні-палігон у Колках, якія знаходзяцца на балансе арганізацыі. Іх плошча і магчымасці, на жаль, не бязмежныя. 3 другога боку, праблема збору другасных матэрыяльных рэсурсаў з мэтай іх далейшай перапрацоўкі не губляе сваёй актуальнасці.

На гэты конт Дзятлаўскае РУП ЖКГ мае сваю стратэгію, пабудаваную на аснове абласнога плана, зацверджанага намеснікам старшыні Гродзенскага аблвыканкама Уладзімірам Дзяшко. Згодна з ім, задача на 2020 год - забяспечыць прыватны сектар горада Дзятлава магчымасцю раздзельнага збору смецця.

Што ужо зроблена?

За сродкі аператара па зборы другасных матэрыяльных рэсурсаў для Дзятлаўскага РУП ЖКГ набыты смеццявоз для працы ў прыватным жылым сектары і 3830 кантэйнераў ёмістасцю 120 літраў. Тэхніка і першая партыя кантэйнераў ужо знаходзяцца на тэрыторыі арганізацыі.

Якія кантэйнеры?

Кожны гаспадар прыватнага дома атрымаё ў бязвыплатнае карыстанне ад РУП ЖКГ два кантэйнеры - шэрага і чырвонага колеру з лагатыпам арганізацыі. Шэры - для збору цвёрдых камунальных адходаў (ён заменіць бочкі і іншыя самаробныя прылады, якімі карыстаюцца гараджане для збору смецця), чырвоны - для другасных матэрыяльных рэсурсаў (шкло, пластык і папера, збіраем усё разам). Графік збору кантэйнераў будзе ўзгоднены і даведзены да ведама грамадзян.

Што адбываецца цяпер?

Дзятлаўчане ў хуткім часе пабачаць сістэму двух кантэйнераў: першая партыя (каля 1300) прыбыла з Санкт-Пецярбурга і будзе дастаўлена ў прыватныя домаўладанні. Затым кожнае прыватнае домаўладанне наведаюць работнікі Дзятлаўскага РУП ЖКГ, якія заключаць з гаспадарамі дагаворы на бязвыплатнае карыстанне кантэйнерамі. Пасля чаго кантэйнеры будуць дастаўлены домаўладальнікам.

- Ад імя арганізацыі прашу ставіцца да гэтай працэдуры з разуменнем і адказнасцю, - звяртаецца да дзятлаўчан намеснік дырэктара Дзятлаўскага РУП ЖКГ Віктар Дзедуль. - Пайсці насустрач нашым работнікам, заключыць дагавор, беражліва адносіцца да маёмасці арганізацыі і выконваць простыя патрабаванні да сарціроўкі. Наша арганізацыя цяпер выконвае вялікі аб'ём работы ў гэтым напрамку, просім зразумець гэта і паспрыяць.

Што далей?

Камунальнікі раёна спадзяюцца, што культура збору другасных матэрыяльных рэсурсаў насельніцтвам павысіцца. У сваю чаргу сістэма "двух кантэйнераў" у наступныя гады мусіць з'явіцца і ў гарадскіх пасёлках нашага раёна.

Навучыўшыся сартаваць, мы дапаможам і прыродзе, і эканоміцы, і сабе, паляпшаючы экалагічныя ўмовы ўласнага жыцця.
Калі ў вас узнікнуць пытанні, звяртайцеся на мабільны нумар 8-044-5092992.

Наталля СТУПЧЫК

Источник: Дятловская районная газета "Перамога" и интернет-портал http://diatlovonews.by/