Курс - на новыя тэхналогіі



Напярэдадні прафесійнага свята камунальнікаў дырэктар Дзятлаўскага РУП ЖКГ Сяргей Луня адказаў на пытанні карэспандэнткі газеты "Перамога".

- На якіх аб'ектах папрацавалі камунальнікі раёна за мінулы год?
- У межах рэспубліканскай інвестпраграмы развіцця малых гарадоў выканалі работы на чатырох аб'ектах у пасёлку Казлоўшчына, у тым ліку - добраўпарадкаванне дваровай тэрыторыі шматпавярховай забудовы па вуліцы Савецкай. У пасёлках раёна праводзілі капітальны рамонт жыллёвага фонду. Ужо ўзнавілі работы на мосце па вуліцы Камсамольскай, якія будуць завершаны сёлета. Знакавай падзеяй стала здача пасля рэканструкцыі шматкватэрнага жылога дома па вуліцы 50 гадоў ЛКСМБ у райцэнтры, дзякуючы чаму маладыя спецыялісты і сем'і змаглі атрымаць жыллё. Акрамя таго, мы пастаянна вядзём работу па абнаўленні аб'ектаў вода- і цеплазабеспячэння. У 2020 годзе па праграме "Чыстая вада" ў аграгарадку Раготна была пабудавана станцыя абезжалезвання вады, у Міроўшчыне - блочна-модульная кацельня, якая працуе без аператара. Істотна мадэрнізавана цэнтральная кацельня ў Дзятлаве, якая сёння абслугоўвае ўвесь жылы сектар райцэнтра, абнавілі цеплавыя сеткі горада і пасёлкаў. Эканамічны эфект радуе: страты цяпла на шляху да спажыўца сталі меншыя, сабекошт ацяплення знізіўся.

- Падзяліцеся бліжэйшымі планамі і задумкамі.
- Плануем актыўна папрацаваць у 2022 годзе ў Наваельні ў межах інвестпраграмы, цяпер рыхтуем пакет дакументацыі. Некаторыя работы ў гарпасёлку пачнуцца ўжо сёлета. Таксама ў бліжэйшыя гады ў Наваельні і Дзятлаве з'явяцца станцыі абезжалезвання, што павысіць якасць вады. У райцэнтры будзем добраўпарадкаваць дваровую тэрыторыю ў мікрараёне вуліцы Перамогі. Распрацоўваем дакументацыю для мадэрнізацыі басейна ў райцэнтры.

- Якія новаўвядзенні чакаюць камунальную гаспадарку раёна?
- Каб якасна выконваць сваю работу, мы штогод абнаўляем транспартны парк. Нядаўна набылі сучасны смеццявоз, прыбіральную машыну і аўтагідрапад'ёмнік, новы грэйдар, які дазволіць павысіць якасць утрымання дарог. Акрамя таго, пачаўся і будзе прадаўжацца працэс тэхналагізацыі нашай службы. Ужо абнавіліся некаторыя кацельні, якія пасля мадэрнізацыі працуюць без аператара ў аўтаномным рэжыме, ім патрэбна толькі перыядычнае тэхнічнае абслугоўванне.

Сёлета такім чынам будуць рэканструяваны кацельні ў Лапушна і Таркачах, а ў выніку - усе кацельні раёна. У сувязі з гэтым аптымізаваўся штат прадпрыемства. Усё больш працэсаў у камунальнай гаспадарцы становяцца аўтаматычнымі, таму з'яўляецца вострая патрэба ў кваліфікаваных інжынерна-тэхнічных кадрах. Аднак, як і ва ўсе часы, фундаментам нашай работы застаецца праца радавых камунальнікаў - працавітых, старанных і дысцыплінаваных патрыётаў сваёй справы.

- Што пажадавцв калектызу у прафесійнае свята?
- Шчыра дзякую кожнаму работніку жыллёва-камунальнай службы раёна за нялёгкую і часта неспакойную працу. Жадаю моцнага здароўя, цярпення, каб у сем'ях панавалі шчасце і дабрабыт.

Наталля АВЯРЧУК

Источник: Дятловская районная газета "Перамога" и интернет-портал http://diatlovonews.by/