ДЯТЛОВЩИНА - информационный портал Дятловского района

Дзятлаўскае ДРБУ-119 з пачатку красавіка пачало капитальны рамонт аўтадарогі "Хадзяўляны-Міроўшчына-Руда Яварская".
На участку паміж вёскамі Накрышкі і Раманавічы аўтамабілям ездзіць не так проста: ямы, шчэбень і шмат пяску. Хуткасць вадзіцелі легкавікоў зніжаюць да мінімуму, каб не пашкодзіць транспарт і засцерагчы сябе.

Цяпер участак рамонту агароджаны часовымі дарожнымі знакамі, а на абочынах дарог - калочкі са спецыяльнымі гарызантальнымі планкамі. Да гэтых планак павінна "дастаць" асфальта-бетоннае пакрыццё, якое хутка пачнуць класці работнікі ДРБУ-119.

Уздоўж дарогі павольна ездзіць грэйдар. Якую работу на ім выконваюць?

- Грэйдар працуе па зняцці расліннага грунту. Палатно даводзіцца да патрэбных параметраў, а потым грунт вяртаецца назад, - тлумачыць галоўны інжынер ДРБУ-119 Аляксей Гірык.

Па іншы бок дарогі - экскаватар, які капае кюветы, водаадводныя каналы. Экскаватар суправаджае самазвал, каб везці грунт з кюветаў. Лінейныя работы праводзіць без дапамогі колавых агрэгатаў немагчыма: перад дарожнікамі стаіць вялікі аб'ём задач.

Па тэрмінах, як адзначыў галоўны інжынер Дзятлаўскага дарожнага рамонтна-будаўнічага ўпраўлення, на палове участка падрыхтоўку пад асфальт трэба зрабіць да сярэдзіны красавіка.

- Ужо прыкладна праз два месяцы можна будзе ездзіць па асфальце, - запэўніў Аляксей Гірык.

Па шырыні земляное палатно плануецца зрабіць 10-метровым: 7 метраў асфальту, астатняя частка - абочыны з пясчана-жвіровага пакрыцця.

Акрамя лінейнай працы, будзе выконвацца і засяроджаная. Напрыклад, плануецца дэманціраваць водапрапускную жалезабетонную трубу.

Таксама работнікі ДРБУ-119 з дапамогай грэйдара прафілявалі ўчастак дарогі, якая вядзе да Данілавіцкага кар'ера.

Юлія БАКУНОВІЧ