Дзяцей трэба зацікавіць



Маладыя спецыялісты - жаданыя і запатрабаваныя работнікі ў кожнай з арганізацый Дзятлаўшчыны. Творчыя і неардынарныя, яны не толькі хутка і ўдзячна вучацца ў старэйшых калег, але і самі прыносяць у працоўныя калектывы новыя ідэі.

Так чаканым папаўненнем педагагічнай сям'і раёна стаў малады настаўнік фізікі, выпускнік Гродзенскага дзяржаўнага ўніверсітэта імя Янкі Купалы Аляксей Вайцешык. Ён адзін выкладае свой прадмет у сярэдняй школе №1 горада Дзятлава і ў Жукоўшчынскай базавай школе.

Аляксей нарадзіўся і вырас у Гродне. Практычнае знаёмства з законамі фізікі пачаў яшчэ ў сярэдняй школе: з 5 класа сур'ёзна займаўся спортам, у юнацкім узросце выступаў за мясцовую каманду "Кронан" у пейнтбольным клубе "Гараднічанка".

Выбіраючы прафесію жыцця, Аляксей не разважаў надта доўга: фізіку і матэматыку добра ведаў і любіў са школы, меў жаданне падзяліцца сваімі ведамі і ідэямі з іншымі людзьмі. Таму пайшоў у педагогіку.

У час размеркавання на выпускным курсе ўніверсітэта з прапанаваных для працы гарадоў выбраў Дзятлава. Малады чалавек прызнаецца, што не ведаў наш горад раней, выбіраў па прынцыпе "бліжэй да дома". I не пашкадаваў. Дзятлава спадабалася яму як чысты, утульны і спакойны горад.

- Калі прыехаў сюды, пешшу хадзіў па вуліцах горада, знаеміўся з мясцовасцю, - кажа Аляксей. - Тут камфортна жыць і цікава працаваць.

Як малады спецыяліст, на першым месцы працы Аляксей Вайцешык атрымаў фінансавую падтрымку ад дзяржавы. Начальства дапамагло з жыллём: настаўнік уладкаваўся ў інтэрнаце на вуліцы Савецкай, там пасябраваў з суседзямі. У школе таксама яго прынялі як свайго, дапамаглі добрай парадай і таварыскай падтрымкай. За добразычлівасць і спагаду малады спецыяліст удзячны адміністрацыі школы № 1 горада Дзятлава.

Першы педагагічны вопыт атрымаўся паспяховым. Аляксей Сяргёевіч - любімы ў дзятлаўскіх і жукоўшчынскіх школьнікаў настаўнік, нязменны выкладчык фізікі з сёмага па адзінаццаты клас. Сам педагог задаволены: школьнікам фізіка падабаецца, вывучаюць яе старанна і з натхненнем. У размове з Аляксеем Вайцешыкам цікаўлюся, як, на яго думку, прыцягнуць сучасных школьнікаў да вывучэння школьнай праграмы.

- Для мяне гэта зрабіць не складана, - адказвае малады спецыяліст. - Я тлумачу вучням, што фізічныя з'явы і законы - ва ўсім вакол нас, прыводжу прыклады з жыцця. Я думаю, дзяцей трэба зацікавіць, і яны будуць вывучаць прадмет з задавальненнем.

Наталля АВЯРЧУК

Источник: Дятловская районная газета "Перамога" и интернет-портал http://diatlovonews.by/